आईपीओ भन्दै कुद्नेहरुले हाईड्रोको यो शेयरमूल्य पनि हेरौं, बेलैमा जोखिमबाट बचौं

0
96


प्राथमिक शेयर अर्थात आईपीओ भन्दै कुद्नेहरुले दोस्रो बजारमा हाईड्रोपावर कम्पनीको शेयर मूल्य हेरेर लगानी सम्बन्धी निर्णय गर्नु अति आबश्यक हुन गएको छ ।

आईपीओ भन्दैमा जिन्दगीभरि कुनै लाभांश दिन नसक्ने कम्पनीको शेयरमा जथाभावी लगानी गरेर दोस्रो बजारमा घाटा खाई शेयर बेच्नुपर्ने अबस्था आईसकेको हुँदा लगानीकर्तामा सचेतता जरुरी देखिएको हो । अहिलेकै शेयर बजारमा हेर्ने हो भने पनि चार वटा हाईड्रोपावर कम्पनीको शेयर मूल्य लगानीकर्ताले आईपीओमा हालेको अंकित मूल्य भन्दा तल आएको छ भने अरु पाँच वटा कम्पनीहरुको शेयर मूल्यमा लगानीकर्ताले आईपीओमा हालेको खर्च मुस्किलले उठ्ने अबस्था छ ।

दोस्रो बजारमा शेयर मूल्य कति हुन्छ मतलव छैन, लाभांशको आधारमा आईपीओमा दीर्घकालीन लगानी गरेको हो भनेर कसैले भन्छ भने पनि बहुसंख्यक कम्पनीहरुले आउँदो केही बर्षसम्म कुनै लाभांश दिन सक्ने छैनन् । कतिपय त जिन्दगीभरि नै लाभांश बाँड्न सक्दैनन् ।

सरकार र धितोपत्र बोर्डले सकेसम्मका खराब हाईड्रो कम्पनीहरुलाई आईपीओ बिक्री गर्न दिएर दोस्रो बजारलाई समेत संकटको डिलमा पुरयाईरहेका छन् । कुनै प्रत्यक्ष नियमनकारी निकाय नभएको, संस्थागत सुशासन अति खराब रहेको र प्रति मेगावाट लागत धेरै भएको कम्पनीको आईपीओ किन्नु बेकारमा नदुखेको टाउको दुखाउनु नै हो । त्यसैले आईपीओ भन्दै खराब कम्पनीमा लगानी गरेर दुखको पैसा खोलामा बगाउनु भन्दा अगाडि १० पटक सोच्नैपर्ने अबस्था आएको छ ।

सोमबार आईपीओको बिक्री बन्द भएको माथिल्लो तामाकोशीको शेयर पनि दोस्रो बजारमा सुचिकरण भएर किनबेच खुल्ने बित्तिकै बिक्री गर्नेको ओईरो लाग्ने तर शेयर किन्ने कोही नहुने अबसथा पनि आउँनसक्छ किनभने् पछि भाउ घट्छ भन्ने भयले शुरुमै शेयर बिक्री गर्न तयारी अबस्थामा रहने मनस्थिति धेरैले बनाएका छन् । अंकित मूल्यमै चार अर्ब भन्दा बढीको तामाकोशीको शेयर आपुर्तिले हाईड्रोको बजारलाई अरु खस्काउन पनि सक्छ । त्यसमाथि रसुवागढी, सान्जेन, भोटेकोशी लगायतका अरु कम्पनीहरु पनि शेयरको बाढी ल्याउन तम्तयार नै छन् ।

अहिले २१ वटा हाईड्रो कम्पनीहरुको शेयर बजारमा किनबेच भए पनि अझै २०० कम्पनीहरुको आईपीओ बिक्रीमा आउँदा सबैभन्दा संकटग्रस्त अबस्था यही क्षेत्रका कम्पनीहरुको हुने संकेत देखिएको छ । तसर्थ कुनै पनि आईपीओमा लगानी गर्नुअघि लागत र लाभांशको अबस्था विचार गरी शेयरको माग र आपुर्तिमा पनि उत्तिकै ध्यान पुर्याउनु अति आबश्यक हुन गएको छ ।

हिजो २८०० रुपैयाँमा चिलिमे किन्नेहरु आज ७०० रुपैयाँ बेच्नुपर्दा चिलिम फर्किएको अबस्थामा छन् भने १३०० रुपैयाँमा सानिमा माई र ५०१ रुपैयाँमा बुटवल पावरको एफपीओ किन्नेहरुको पनि हालत पतला हुँदै गएको छ । हाईड्रोपावर कम्पनीको शेयरको संख्यात्मक बृद्धिले यस क्षेत्रलाई संकटमा धकेल्दा ती शेयर किन्नले लामो समयसम्म लाभांश नपाएरु तडपिनु पर्ने पीडाको हिसाब किताब गर्नु पनि उत्तिकै महत्वपूर्ण छ । हाईड्रोपावरको विकास देशको आबश्यकता हो भन्दैमा लगानीकर्ताहरुले खराब कम्पनीमा लगानी डुबाएर जोगी बन्नु हुँदैन ।

जवाफ छाड्नुस्

Please enter your comment!
Please enter your name here